Район хаҫачӗ 90 ҫул тултарнине халалланӑ ҫаврака сӗтел ларӑвӗ иртрӗ

1931 ҫулхи сентябрӗн 4-мӗшӗнче "Колхозри ӗҫ" хаҫатӑн пӗрремӗш номерӗ тухнӑ. Вулаканпа диалогра 90 ҫул - хаҫатшӑн ӑмсануллӑ шӑпа. Пирӗн район хаҫачӗпе вулакансен темиҫе ӑрӑвӗ ҫыхӑннӑ. Хаҫатҫӑсен пултарулӑхӗпе хастарлӑхӗ нумай ӑрушӑн ҫак ҫул тӑрӑх тивӗҫлӗн, шанчӑклӑн, малашлӑха шанчӑклӑн пӑхма пулӑшнӑ.

Паян районти тӗп библиотекӑн вулав залӗнче таврапӗлӳ кӑларӑмӗн паллӑ датине халалланӑ ҫаврака сӗтел ларӑвӗ иртрӗ. Унта маларах редакцире ӗҫлекен журналистсем те, паян хаҫат тӑвакансем те, Пишпӳлек историпе этнографи музейӗн ӗҫченӗсем те, тӗп библиотека ӗҫченӗсем те, вулакансем тата районти тахҫанхи ҫыравҫӑсем те хутшӑнчӗҫ.

Район хаҫачӗн коллективӗ паян мӗнпе пурӑнать, публикацисем валли мӗнле темӑсем ҫивӗч — ҫак тата ытти темӑсене сӳтсе яврӗҫ "ҫаврака сӗтел" хушшинче.